Биди Зелен

Мисијата на Биди Зелен е да развиваат вредности и принципи за одржлив развој и да овозможуваат образование и практични решенија за заштита на животната средина. Нивната визија е да има свет во мир каде луѓето живеат во целосна хармонија со природата. Стратешки области во кои работат се зелени работни места, еколошко образование, младинска активизам, а во следниот период ќе работат и на социјално претприемништво. Познати се по своите еко клубови во училиштата.

Аква Струга

Мисијата на АКВА е да придонесе кон локалниот развој, локалната демократија и граѓанскиот активизам во регионот на Струга, Охрид и Вевчани. АКВА ја зајакнува улогата на граѓанскиот сектор во локалниот развој и областите добро владеење и донесување одлуки, го поддржува и јакне младинскиот активизам во локалната заедница, го зголемува учеството во процесите на европска интеграција на локално и национално ниво.  Програми: добро владеење, млади и соживот, ЕУ интеграции, мониторинг и истражување, граѓански активизам, иницијативи во заедницата, застапување и лобирање.

Реактор - истражување во акција

Земајќи го предвид недостатокот на расположливи податоци во процесите на креирање политики на национално ниво, една од главните стратешки цели на Реактор е обезбедување на релевантни, навремени и темелно истражени податоци со цел информирање за политичкиот процес во нивните целни области. Главниот метод што Реактор го користи во истражувачките активности е комбинација на квалитативни и квантитативни методи прилагодени за потребите на истражувачките прашања и теми. Најчести области на истражување се родова еднаквост, млади и урбан развој.

Фондација за развој на локалната заедница - ФРЛЗ Штип

Фондацијата за развој на локалната заедница – Штип е прва фондација за заедницата во Република Македонија. Она кон што тие се стремат е засилена демократизација на Република Северна Македонија и развој на консолидација на граѓанско општество, зајакнато учество на младите луѓе во општеството, подобрен локален економски развој, подобрување на локалните политики и засилување на децентрализацијата, преку активно учество на граѓаните. Дополнително, тие нудат правна, финансиска и техничка поддршка на граѓански организации.

Џуниор Ачивмент Македонија

Џуниор Ачивмент Македонија е основана на 30 октомври 2017 година, како една од 123 членови на JuniorAchievementWorldwide која ги поттикнува и помага младите за идните работни места и е дел од регионалниот оперативен центар на JA Worldwide во Европа – JA Europe. Главната дејност на организацијата е спроведување на програми за претприемничко образование, финансиска писменост и подготвеност за работа на средношколци. Во центарот на дејноста се наоѓа програмата за Ученички компании, која ги поттикнува средношколците да работат на развивање на бизнис идеја за време на учебната година и на практичен начин да се здобијат со знаења, вештини и компетенции како што се креативност, самодоверба, преземање иницијатива…

Младински културен центар - Битола

Визија на МКЦ Битола е развиено демократско општество во кое младите се носители на прогресот. Мисија е обединување и развој на креативните потенцијали на младите и поттикнување на граѓанскиот активизам. Нивни долгорочни цели се развој на волонтерството и неформалната едукација, развој на демократското и граѓанското општество, развој на урбаната култура и продукција, додека пак краткорочните цело се одржлив развој на Волонтерски центар на Македонија, подобрување и јакнење на вештините кај младите, поддршка и поттикнување на граѓанските иницијативи и кампањи, поддршка и афирмација на урбаната култура.

Фондација Метаморфозис - Скопје

Фондацијата Метаморфозис е организација која делува на национално и интернационално ниво. Нивниот тим е составен од активисти посветени на деморатијата. Нивната визија е општество во кое ангажираните и свесни граѓани активно се служат со иновативни алатки за остварување на своите граѓански права и одговорности, општество во кое тие се претпазливи во однос на влијанието и барањето одговорност од властите, притоа обезбедувајќи демократско, одговорно и подготвено владеење. Во склоп на Метаморфозис функционираат следниве програми: медиуми за демократија, општествена одговорност, едукација за иновации, човекови права на интернет.

Еко Живот

Здружението за заштита и унапредување на животната средина Еко-Живот Кавадарци е основано во 2010 година со цел заштита и унапредување на животната средина, подигнување на еколошката свест и вклученост на граѓаните, особено младите луѓе, спроведување на еколошки акции и проекти. Дел се од еколошката платформа „Зелена Македонија“, со активно учество, која има за цел неутрализирање на еколошките жешки точки. Имаат учествувано во 20 Еразмус+ проекти, повеќе локални и регрантирани европски проекти. Еко-Живот има голем број на активни членови и волонтери кои се од разновидни професии како екологисти, биолози, правник, експерти за пишување и спроведување на проекти и т.н.

Центар за развој на заедницата (ЦРЗ) Светла Иднина - Кочани

Мисија на организацијата е организација чија работа е насочена кон одржлив развој на ромската заедница преку јакнење на капацитетите на заедницата и промовирање на мерки за масовно вклучување во процесот на донесување на одлуки и креирање на јавни политики. Визија на организацијата е самостојна и стручно-компетентна организација која преку применливи идеи и акции во заедницата овозможува платформа за толерантно и мултиетничко општество, социјална вклученост, родова еднаквост и поддршка на маргинализираните групи во заедницата. Области во кои делува се добро владеење, развој на граѓанското општество, меѓуетнички односи, вработување, образование, наука и истражување, здравје и здравствена заштита.

Здружение за социјални иновации - АРНО

Нивните напори се насочени кон дизајнирање и имплементирање на нови простапи за решавање на општествените предизвици. Според нив клучот на иднината е одржливиот развој, па затоа тие размислуваат за сите работи што ги прават и како влијание имаат истите врз економијата, општеството и животната средина. Застапуваат за етика, општествена одговорност и филантропија во бизнисите. Тие се препознатливи по натпреварот Зелени идеи кој го организираат секоја година. Областите кои ги опфаќаат преку својата работа се филантропија, стручно образование, социјално претприемништво, социјални иновации, родова еднаквост, одржлив развој, образование, млади, зелена економија.

Сфера Интернационал

Здружение за одржлив развој СФЕРА ИНТЕРНЕШНАЛ – Битола e здружение на млади и заради остварување на дејности и активности со кои ќе се подобри информираноста на граѓаните за заштита на животната средина и здрав живот преку нивно директно учество во активностите. Визијата на СФЕРА е чиста, еколошка животна средина во Република Северна Македонија и искористување на алтернативните извори за енергија. СФЕРА преку неформално образование поттикнува практикување на здрав живот, грижа за животната средина, активно учество на младите во РСМ и волонтерство.

ЛЕАД

LEAD е граѓанска организација основана од 10 индивидуи со позадина од граѓанскиот, приватниот, јавниот сектор и образованието. Организацијата тежнее да постигне состојба во која младите во партнерство со возрасните активно учествуваат во општествените процеси, преземаат лична одговорност за моменталната состојба и преку континуиран личен развој придонесуваат за подобро општество. Работата на LEAD се темели на креирање на едукативни програми кои поттикнуваат личен развој, институционално јакнење и одржливост. Нивната експертиза е креирање на едукациски програми и искуства, личен развој кај млади и лица што работат со млади, вештини за вработување, институционално јакнење на организации и компании.

Младински Сојуз - Крушево

Младински Сојуз – Крушево е организација за млади која се фокусира на лица од 15 до 35 години. Нивната визија е активно вклучување на младите луѓе во сите пори на општествениот живот и нивно влијание врз донесувањето на одлуки на локално, национално и регионално ниво. Нивната мисија е младинска организација која поттикнува динамично општество со активно организирање, ангажирање и учество на младите луѓе, охрабрува младинска поддршка на ЕУ интеграцијата на Југоисточна Европа, ги промовира современите европски вредности како и поддржува нови начини на изразување на ставовите на младите луѓе.

Сумнал

Сумнал организира и изведува различни образовни и општествени активности, како и активности кои го градат карактерот во врска со материјалот кој се учи во редовните училишта и наставните планови подготвени од Министерството за образование и наука. За само неколку години услугите кои ги обезбедува Сумнал драстично се зголемија, иако организацијата остана верна на првичната мисија и цели. Преку соработка со заедницата, соработка со Советот на родители и воспоставување блиски односи со локалните училишта, Сумнал е во можност да ги идентификува и да започне да излегува во пресрет на дополнителните потреби на заедницата. Области во кои Сумнал делува: развој на граѓанското општество, меѓуетнички односи, толеранција, култура, деца, младинци и студенти, стари лица, здравје и здравствена заштита, информации, комуникација и медиуми.

ХЕРА

ХЕРА е организација која активно работи во полето на репродуктивна слобода, контрацепција, здравје на Роми, социјално претприемништво, здравје во криза, сексуалност и попреченост, сеопфатно сексуално образование, ХИВ, родова рамноправност, поддршка на ЛГБТИ и поддршка на млади. Воедно, во склоп на организацијата функционира социјалното претпријатие Нега+, но и неколку сервиси: Мобилна гинеколошка амбуланта, Младински центри „Сакам да знам“ на Водно и во Шуто Оризари, доверливо советување и тестирање за ХИВ и Прв семеен центар.

Мултикултура

Про Локал - Битола

Про Локал е здружение на граѓани основано во Битола во 2009 година со цел унапредување на развојните процеси. Про Локал е доброволно и непрофитно, непартиско и невладино здружение кое работи на подобрување на условите за живот на граѓаните, особено на младите и севкупен одржлив развој на општеството. Про Локал ја заснова својата работа на добрата интернационална пракса водејќи се од принципите на демократичност и вклученост. Про Локал е регионална организација која делува во различни области, притоа генерирајќи идеи и практични решенија за унапредување на развојот на локалните заедници, локално владеење, децентрализација, регионален развој, рурален развој, развој на одржлив туризам, вклучување на младите и застапување на нивните потреби од сите населени места, рурални и урбани, во Пелагонискиот регион. Во организацијата се вклучени над 15 експерти од горенаведените области кои работат на различни проекти финансирани од домашни и странски донатори.

ЗИП Институт - Скопје

ЗИП Институт е независна, невладина организација која има за цел да ги подобри демократските процеси, владеењето на правото и развојот на граѓанското општество во Република Северна Македонија преку прилагодени решенија за најитните социјални, општествени и систематски проблеми. Клучна карактеристика на работата на ЗИП Институт се детални, сеопфатни анализи, иницијативи и акции на локално, национално и регионално ниво, како и поврзување на процесите на истражување и анализа со конкретни решенија за најосновните проблеми и придонесување кон процесите на креирање политики. Преку соработка со релевантни засегнати страни, како владини, невладини и регионални институции, ЗИП Институт има за цел да ги зајакне демократските процеси во Северна Македонија, да покаже почит кон владеењето на правото и да ги заштити човековите права и да обезбеди најдобри решенија за проблемите на граѓаните и институциите во македонското општество.

Интерактив - Битола

Здружението за меѓународна младинска соработка ИНТЕРАКТИВ од Битола е непрофитна, граѓанска младинска организација која има за цел да обезбеди можности за локалната младина но и соработка со младите на меѓународно ниво. Здружението е основано во јули, 2017 година во Битола, Република Северна Македонија. Целта на здружението е да развива активности и можности за младите во сферата на неформалното образование, промовирање на здрави животни навики, културата и уметноста како и граѓанско општество кои ги поттикнуваат позитивните вредности кај младите луѓе.

ЕКВАЛИС

Еквалис е организација која работи на вмрежување на граѓаните во платформи за социјален развој, креира едукативни платформи и овозможува простор за еднаков пристап до едукација за лица со диверзитетна позадина, активно работат во областа на развој и унапредување на човековите права, креирање на политики и креирање на услови за одржлив развој преку екомонска, социјална и политичка перспектива. Визијата на Еквалис е да изгради заедница каде граѓаните ќе бидат едуцирани, ќе ги преиспитуваат и менуваат социјалните процеси за индивидуално и општо добро.

Еко Логик - Скопје

Здружението на граѓани Еко Логик е непрофитна организација која е посветена на заштита и зачувување на животната средина, промоција на современи еколошки практики, како и следење и промовирање на принципот на одржлив развој.

ЛИДЕМ - Либерално-демократска младина

ЛИДЕМ се подмладок на Либералната партија во Македонија. Како подмладок, тие се залагаат за промена на: корупција во образованието, лош студентски стандард, непризнаени дипломи, безперспективност, немање на можности за вработување, немање на можност за купување на сопствена стан, дискриминација по политичка, верска, национална, полова, сексуална, социјална и друга основа, еднакви права за жените и мажите, загадена животна средина и недоволна спортска активност. 

Секција на млади на Сојузот на синдикатите на Македонија (СМССМ)

Во работата на секцијата се вклучени млади лица, членови на синдикатите здружени во ССМ, не постари од 35 години. Секцијата на млади при ССМ се ангажира младите да ги доближат сфаќањата за неопходноста од нивно синдикално организирање заради изразување на мислењата, потребите и позицијата на вработените млади. Таа дејствува во правец на намалување и елиминирање на препреките кои го кочат остварувањето на правата на младите при вработувањето и од работниот однос, како дел од вкупните човекови права, со што ќе влијае врз свеста, моралната цврстина и чувството на самодоверба на младите, за нивната вредност и важност во вкупниот општествен живот.

СДММ - Социјалдемократска младина на Македонија

Социјалдемократската младина на Македонија дејствува заради остварување на следниве политички начела и цели: целосно почитување на човекот, на неговото достоинство и на неговите основни права и слободи, развивање на плуралистичко, праведно и солидарно општество на социјална демократија, развивање на економска демократија и остварување на правата на работниците, остварување на социјална и национална еманципација на граѓаните, развивање на Македонија како суверена, демократска и правна држава, обезбедување на сите човекови права и слободи на Македонците во соседните земји и развивање на постојана духовна и културна комуникација со нив и со иселениците.

Младинска организација на ДУИ

Идејата на Младинскиот форум на ДУИ е младите со различни идеологии и различни активности да се обединат, со единствена цел а тоа е погласно делување за работите поврзани со младите и дејствување и факториризирање на младите во нашата земја. Тие сметаат дека младите се генератор на промените и позитивните случувања и токму затоа се стремат да создадат подобра иднина за младите во оваа држава.

УСС - УКИМ - Скопје

УСС-УКИМ претставува повеќе од 21000 студенти, се грижи за квалитетот на животот на студентот и квалитетот на процесот на студирање, студентскиот стандард, остварувањето на студентските права и интереси и за студентската културна, социјална и интелектуална надоградба. Организатор е на првата Студентска интердисциплинарна конференција, Летен камп за кариерен развој и др. Автор е на студентскиот манифест – клучни цели за развој на високото образование, потпишан од вкупно 6 македонски универзитети.

УСС - УКЛО - Битола

Наши цели и задачи се да ги штитиме интересите на студентите, да учествувавме преку свои претставници во одлучувањето во органите и телата на универзитетот, да ги претставуваме студентите во рамки на високото образование како членови на академската заедница, да влијаеме на законодавното регулирање на прашања и интереси на студентите, поттикнување и спроведување на заеднички активности и манифестации од различен карактер со цел подобрување на студентскиот стандард.

Младински Форум на Демократска Партија на Турците на Македонија

Подмладок на Демократска Партија на Турците на Македонија.

ОДАС - Организација за дијалог и афирмација на средношколците и студентите

ОДАС е невладина организација за млади која работи веќе 4 години со студенти и средношколци. Како организација го организиравме првиот Национален средношколски самит во 2022 година, постигнавме промена за полагањето на државната матура поради условите во образованието овие 4 години, реализираме голем број настани, работилници и дебати во областа на образованието, младинското учество и младинските политики, а со цел поттикнување на иницијативност кај младите и застапување на нивните интереси

Културно Ехо

Со осврт кон архитектурата и други уметности, па се до компјутерските и правните науки, мисијата на Културно Ехо е да ја промовираат корпоративната урбана и еколошка одговорност; повторно откривање, редефинирање и решавање на заедничките прашања преку конвенционални стратегии и нови перспективи за создавање на одржлив урбан, социјален, општествен и културолошки развој. Нивниот фокус во скоро време е заложба за реставрирање на фабриката КУПРОМ и нејзино претварање во студентски град.

Здружение за значењето на еколошкото образование

ЗЕОООП Скопје овозможува едукација и проучување за важноста на образованието за животната средина во модернизација на образовниот процес, од гледна точка на социјалната екологија како посебна социологија која го проучува специфичен однос помеѓу човекот и неговата околина.

Здружение Ековита

Здружението Ековита работи на Заштита и одржливо искористување на животната средина со вклучување на младите. Дејноста во која работиме е Екологија. Како здружение ние се залагаме за чиста животна средина и го слушаме гласот на граѓаните, односно, Архуската конвенција. Во нашето здружение работиме со биолози, млади агрономи, правник, младински активисти и волонтери. Нашето социјално претпријатие Mushroom network кое ќе одгледува печурки и истовремено ќе биде и сервис за одгледување печурки, во кој ќе се врши обука на лица кои припаѓаат во категоријата на: социално загрозени лица и млади невработени лица од рурални подрачја. Краткорочни цели кои се залагаме се: Давање стручна помош и поддршка за производство на различни видови печурки во производствениот погон, како мрежа ќе помогнеме и во делот на пласманот на печурките, ќе воспоставиме дигитална продавница за печурки – digital mushroom shop, ќе обезбедиме повеќе информации за хранливата вредност на печурките. Додека како Долгорочните цели – Намалување на невработеноста кај младите и влијание врз запирање на процесот на младинска миграција.

Млади од семејна разновидност

Млади од семејна разновидност е младинска организација која се залага за правата на децата и младите од еднородителски и самохрани семејства, а воедно и различни семејни конструкции. Мисијата на здружението е унапредување на родовата еднаквост и политики, социјална и економска заштита, со цел подобрен третман за овој тип на семејства.

ЦСИ Надеж - Скопје

Здружението Центар за социјални иницијативи Надеж е невладина организација која активно се залага за подобрување на квалитетот на живот преку овозможување еднаков пристап до квалитетно образование, социјална интеграција и кое промовира и реализира активности за стекнување на вештини на младите и маргинализираните заедници со фокус на Ромите во Р. Северна Македонија. Ц.С.И. НАДЕЖ работи активно на спроведување на четири стратешки приоритети: 1) Овозможување на воспитно-образовна поддршка на деца и млади од маргинализирани семејства; 2) Подржување на ре-интеграцијата и вклученоста на повратниците од Европските земји во локалните заедници; 3) Зголемување на вклученоста на младите во локалните заедници; 4) Подобрување на социјалната вклученост на маргинализираните групи преку концептот на социјално претприемништво. Здружението работи на национално и меѓународно ниво.

Здружение НИЕ СИТЕ Скопје

Здружение НИЕ СИТЕ Скопје е невладина, непрофитна граѓанска организација која се стреми да ја промовира и зајакне заштитата на човековите права, како и да влијае и да биде дел од процесот на создавање на граѓанско општество со цврсти демократски вредности и владеење на правото. Мисијата на здружението е да ја инспирира младината и пошироката јавност кон реализација на човековите права и слободи, промовирање на културната различност, дијалогот и толеранцијата.

Зелен Округ

Центарот за социјално претприемништво и одржливост Зелен Округ е организација за млади фокусирана на решавање на предизвиците со климатските промени преку развивање на иновативни решенија. Целосно се посветени на трансформација на нашата заедница во одржлив систем каде никој не е заборавен и одлуките се донесуваат на свесен начин. Социјалното претприемништво е нешто што ги поврзува сите овие елементи, а дополнително придонесува до финансиска независност на младите и намалување на стапката на младинската невработеност. Приоритет за поддршка даваат на маргинализираните млади, најчесто на девојки, роми, млади кои доаѓаат од семејна разновидност, ЛГБТ лица и слично.

Младински клуб на Турците - Гостивар

Младински клуб на Турците – Гостивар е здружение основано во 2019 година во Гостивар, чија мисија е да се обезбеди националното единство на турската младина, да се задржи на нозе турскиот јазик и култура и младите да имаат корист од сите видови на можности

Иницијатива за правата на жените од Шуто Оризари

Визијата на Иницијативата на жени на Шуто Оризари е дека секоја млада девојка и жена Ромка ги остварува своите социјални, економски и здравствени права, на еднаква основа со другите жени, без дискриминација.

Мисијата на Иницијативата на жени на Шуто Оризари е да биде водечка женска ромска организација која ќе ја застапува, омоќнува и едуцира млади девојки и жени Ромки да ги остваварат социјални, економски и здравствени права, без дискриминација, а истовремено обезбедува и нуди информации, социјални услуги и правна помош кон остварување на нејзините права.

Целта на Иницијативата за правата на жените на Шуто Оризари – Скопје е да секоја млада девојка и жена Ромка ги остварува слободно и еднакво своите социјални, економски и здравствени права, на еднаква основа со другите жени, без дискриминација. Здружението ќе ја остварува целта преку застапување, омоќнување и едуцирање млади девојки и жени Ромки за да ги остваварат
социјални, економски и здравствени права, без дискриминација, а истовремено преку обезбедување и нудење информации, социјални услуги и правна помош кон остварување на нејзините права.